قدس الآباء الأجلاء، حضرة رئيس الفرع المحترم، أهالي أطفالنا الأحبّاء،
الدرجات يللي اليوم استحقوها ولادنا بهالاحتفال هي تكريس لتقدّم عملوا بمطرح معيّن بحياتون ومتل عادتنا كلّ سنة بهالفترة منحتفل معهم ومننبسط فيّهم بس للصراحة هالإحتفال إلو معنى أبعد من هالنهار، إلو معنى بالوعد يللي أدّوا قدام الربّ وقدامكون؛ أنتو يلّي جيتوا تتقولوا آمين عليه.
بتعرفوا شو يعني نقول آمين بالكنيسة؟ يعني نحنا موافقين على اللي سمعناه أو قلناه ورح نلتزم فيه ونشتغل بموجبه كل حياتنا.
يعني لما وعدوا ولادنا إنو هني بدون يكرّسوا حياتون كلها ليكونوا شهود للرب يسوع، ونحنا وافقنا معهم وقلنالهم آمين هيدا بيعني إنّو نحنا عم نوافق إنو ولادنا يكونوا بحياتون عم يشهدوا للرب وانّو رح نشتغل معهم ونساعدهم تيحققوا هالشي، يعني عمليّاً ولادنا شرّكونا معهم بهالوعد وبهالمسؤوليّة.
كرمال هيك هيدا أحد الأمثلة عن عملية التربيةّ يللي ما بتكون باتجاه واحد؛ كلنا منفكر إنو التربية هي من إختصاص الأهل بس، وأوقات كتير منقول بين بعض أنو صاروا ولادنا عم بيربّونا. بدي قلكم مش غلط إنو ولادنا يربّونا لأن ممكن يكونوا عم بيدلّونا على أمور صارت غايبة عن بالنا بعجقة هالأيام وهي أساس حياتنا. بعبارة تانية يمكن يكونوا ولادنا عم ينقلوا كلمة ربنا لحياتنا وبيوتنا بدون ما يقصدوا وهالشي سبق وصار مع كتير عِيَل قبل، فاسمعوا لهم واسمحوا يعلّموكم.
ساعدوهم يكتشفوا حلاوة ربنا من خلال محبتكم إلهم وصبركم عليهم، وما تسمحوا لأيّ شي إنو يعرقل مسيرتهم نحو يسوع. وإنتم يا فتيان يسوع اشتغلوا تتقدروا تجيبوا أهلكم معكم عالكنيسة كلّ أحد، وهيدا بيكون أول عمل بتعملوا للرب.
ختاماً، بشكر بإسم أسرة الطفولة كل يللي شاركونا بهالإحتفال، ومنتمنى تساعدونا على ترسيخ كلمة الرب في نفوس أولادنا.
وكل سنة وأنتم بخير.
الأحد في 25 /11/2012
تذكار عيد القدّيسة كاترينا