هي عبارة عن حوار بين فتاتين وتبدأ بسماع الأغنية التالية:
الأغنية : بحبك بحبك حب مش مألوف .. ما بينحكى ولا بينوصف بحروف..وقديش مروا على الدهر عشاق متل حبي الدهر ما بيشوف…
البنت 1 : يا ربي قرب عيد العشاق ..وشو حابة لاقي حدا يحبني هيك متل الأغاني..
البنت 2 : انا عندي حدا بيحبني حب حقيقي.. موبس حب أغاني.. أحلى من هيك بكتير ..
البنت 1 : ليش فيه أحلى من هيك ؟
البنت 2 : أيه طبعا فيه ..رح أقرا لك الرسالة يلي بعتها حبيبي…
الرسالة: حبيبتي الغالية:
لا تستغربي إني عم ابعت لك هالرسالة ..بعتها لأني بحبك كتير كتير . أنا بعرف كل شي عنك وأنت بكل لحظة قدامي ودايماً عيني عليكي.
وقت بشوفك زعلانة أو موجوعة أو تعبانة ..كتير بتضايق وبنوجع أنا كمان ..بحب أنك تفرحي دايماً وتكوني مبسوطة دايماً .. أنت خلقتي لتعيشي بفرح مغمورة بالمحبة ..وبعيدة عن كل وجع وقهر.
كرمالك مستعد أعمل كل شي ..مستعد أتحمل مسؤولية كل أخطائك وآخد كل أوجاعك ..ماعندي أغلى منك..بحبك أكتر ما بتتصوري ..ومستعد موت بدالك ..فداك ..بس أنت عطيني فرصة..حاولي تتعرفي علي..جربي تحاكيني ..ووقتها ( يمكن أو رح ) تحبيني ..
مشتاق ترد علي…
البنت 1 : يا الله شو حلو .. معقول في حدا بيحب هيك ..وعن حقيقة ومو بس بالقصص والأغاني .. نيالك..يا ريت أنا كمان هيك بنحب.. طيب عرفتي مين باعت لك الرسالة و شو اسمه حبيبك؟
البنت 2 : حبيبي .. اسمه .. يسوع..ورسالته هي باعتها لكل العالم.
